«Երեւանից դուրս անշարժ գույքն արժեք չունի եւ սա խնդիր է, բիզնեսն այնտեղ չի կարողանում այն որպես գրավ օգտագործել եւ իր բիզնեսի համար միջոցներ ներգրավել: Միկրոֆինանսավորումը հարցի լուծում չէ»,- այսպիսի մտահոգություն է հայտնել Վերակառուցման եւ զարգացման Եվրոպական բանկի (ՎԶԵԲ) Երեւանյան գրասենյակի ղեկավար Մարկ Դեյվիսը: 

Նրա խոսքերով, ՎԶԵԲ-ը տեղական շուկայի խորհրդատուների համար, որոնք իրենց խորհուրդներով ՓՄՁ-ներին են խորհրդատվություն մատուցում, դասընթացներ է անցկացնում` նպատակ ունենալով զարգացնել տեղական խորհրդատուների փորձագիտական հմտությունները: 

ՎԶԵԲ մասնագետները համոզված են, որ ՓՄՁ-ներին կրթելով նրանք ավելի հեշտ կարող են ֆինանսական միջոցներ ներգրավել բիզնեսը զարգացնելու համար: «Խորհրդատվություն փոքր բիզնեսներին» ծրագրի տարածաշրջանային ղեկավար Ջեֆֆ Ֆերրիի խոսքերով, հնարավոր է մի օր գա, որ միջազգային փորձագետները դուրս գան Հայաստանի շուկայից, ուստի կարեւոր է, որ տեղական խորհրդատուներն ունենան այդ հմտությունները: Բիզնեսին խորհրդատվություն տալու փորձը պարոն Ջեֆֆին շատ է կարեւորում, եւ գտնում է, որ այդ խորհրդատվություններից օգտվող բիզնեսը գրավիչ է դառնում բանկերի համար: 

2003 թվականից մինչ 2015 թվականը 1200 նման ծրագրեր է մեր երկրում իրականացվել 133 միլիոն եվրո վարկավորմամբ: Ըստ ՎԶԵԲ-ի, ՓՄՁ-ներին ֆինանսավորման ու զարգացման խմբի «Խորհրդատվություն փոքր բիզնեսներին Հայաստանում» ծրագրի ղեկավար Տիգրան Աղաբեկյանի, այն բիզնեսներին, որոնց խորհրդատվություն է մատուցվել, 94 տոկոս արդյունավետություն է գրանցվել: Հարցին, թե ՎԶԵԲ-ը մասնակցե՞լ է Հարկային օրենսգրքի մշակման աշխատանքներին, պարոն Դեյվիսն ասաց, որ ՎԶԵԲ-ը Հարկային օրենսգրքի քննարկումներին ակտիվ կերպով ներգրաված չի եղել: Մարկ Դեյվիսը համոզված է, որ Հայաստանում փոքր ու միջին բիզնեսի ոլորտն ունի լուրջ ներուժ եւ այն տնտեսության շարժիչ մասն է, սակայն հաճախ առկա են ֆինանսավորման սահմանափակ այլընտրանքներ. «ՓՄՁ-ներն այսօր ներդրումներ ձեռք բերելու համար առավել խորը գնահատման եւ համապատասխան կառուցվածքների կարիք ունեն: Տեղական խորհրդատուների համար սա շատ օգտակար եւ տեղին դասընթաց է, քանի որ Հայաստանում ՓՄՁ ոլորտը առաջխաղացման կարիք ունի»: