Բարաք Օբաման տարածք է վարձակալել, որտեղ նա կարող է աշխատել ԱՄՆ-ի նախագահի լիազորությունները վայր դնելուց հետո: The Washington Post-ի հաղորդած տեղեկատվության համաձայն, նա գրասենյակային տարածք է վարձակալել Վաշինգտոնում Վայրի բնության համաշխարհային հիմնադրամի գլխամասում: Գործարքի կնքման մասին տեղեկատվությունը հաստատվել է երկու աղբյուրների կողմից, սակայն համաձայնության մասին պաշտոնապես չի հայտարարվել:

ՎԲՀՀ-ին պատկանող շինության մեջ ազատ տարածքները այլ կազմակերպություններին վարձով են տրվում: Օբամայի մամլո ծառայությունը հաստատեց այն փաստը, որ նա պատրաստվում է տեղափոխվել՝ չնշելով, թե կոնկրետ որտեղ է գրասենյակը:

Այդ ամենի հետ մեկտեղ, հայտնի է, որ նախագծերի մեծ մասը, որոնցով Օբաման մտադիր է զբաղվել նախագահի լիազորությունները իր իրավահաջորդին փոխանցելուց հետո՝ կենտրոնացած է Չիկագոյում: Այնտեղ նա մտադիր է կառուցել սեփական գրադարանը և լիդերության զարգացման կենտրոն բացել: Իսկ Օբամայի ընտանիքը ապրելու է նոր գրասենյակից մեկուկես կիլոմետր հեռավորության վրա, որը գտնվում նախագահի կրտսեր դստեր դպրոցի մոտ:

Պետք է նշել, որ Բարաք Օբաման աշխատելու է ԱՄՆ-ի մայրաքաղաքի «կանաչ» շինություններից մեկում: ՎԲՀՀ-ի գլխամասը ԱՄՆ-ի Green Building Council-ի ամենաբարձր վարկանիշն ունի: Այդ շինությունը հագեցած է արևային պանելներով: Կայանատեղերում հիբրիդային և էլեկտրական մեքենաների տեղեր են հատկացրած, իսկ տանիքում այգի է տեղադրված: