Մարտի 21-ին ՀՀ Կառավարությանն առընթեր անշարժ գույքի կադաստրի պետական կոմիտեի «ՈՒսումնամեթոդական կենտրոն» ՊՈԱԿ-ում կոմիտեի նախագահի տեղակալներ Աշոտ Մուսայանը և Դավիթ Սեդրակյանը հանդիպեցին Ասիական Զարգացման բանկի Հայաստանյան գրասենյակի փոխտնօրեն Սեզար Լորենս Ալվարեսի և ԱՄՆ ՄԶԳ Հայաստանյան Առաքելության ներկայացուցիչների հետ: Քննարկման համաձայնությունը ձեռք էր բերվել կոմիտեի նախագահ Մարտին Սարգսյանի հետ մարտի 16-ին տեղի ունեցած հանդիպման ժամանակ:
Հանդիպման առարկան Հայաստանի Հանրապետությունում Երկրատեղեկատվական համակարգի քարտեզագրական բազայի ստեղծումն էր, որը հիմք կհանդիսանա հանրապետությունում առկա ռեսուրսների վերաբերյալ քարտեզագրական և տեքստային տվյալների տեղեկատվական բանկի ստեղծման համար և կծառայի տնտեսության տարբեր բնագավառների խնդիրների լուծմանը:
ՀՀ ԿԱ ԱԳԿՊԿ «Գեոդեզիա և քարտեզագրություն» ՊՈԱԿ-ի Երկրատեղեկատվության բաժնի պետ Արամ Ստեփանյանը հյուրերին հանգամանալից ներկայացրեց կադաստրի պետական կոմիտեի կողմից Երկրատեղեկատվական համակարգի (ԵՏՀ) ուղղությամբ ստեղծված նյութերը: Պարոն Ստեփանյանի խոսքով ԵՏՀ-ն ժամանակակից համակարգչային տեխնոլոգիա է, որը պարունակում է տվյալների հավաքագրման, պահպանման, վերլուծության և գրաֆիկական արտապատկերման հնարավորություններ. «Պետական մասշտաբով Երկրատեղեկատվական համակարգերի ստեղծումը և ներդրումը թույլ կտա բացառել ոչ բավարար հիմնավորում ունեցող որոշումների ընդունումը և անցնել պետական կառավարման որակապես նոր մակարդակի»,- նշեց Արամ Ստեփանյանը:
Այնուհետև կողմերն անցան բովանդակային քննարկումների, որի ավարտին վերջիններս ձեռք բերեցին պայմանավորվածություն՝ կատարվելիք աշխատանքների վերաբերյալ ավելի առարկայական քննարկում իրականացնել առաջիկա հանդիպումների ընթացքում:
WIDE RANGE OF PAYMENT METHODS
DO NOT HESITATE TO CONTACT US