Անշարժ գույքի շուկայի հայաստանյան գները

07.12.2014

Օրերս հայտնի էին դարձել եվրոպական այն քաղաքները, որտեղ անշարժ գույքն ամենաթանկն է: Ռեկորդակիրը Լոնդոնն է, որտեղ բնակարանի մեկ քմ արժեքը միջինը կազմում է 10 հազ. եվրո, նրան հաջորդում է  Փարիզը`  8,3 հազ. եվրոյով, երրորդ տեղում Մյունխենն է` 5,0 հազ. եվրոյով:

Հայաստանում ռիելթորները «արտասահմանյան» պահանջարկի հույս ունեին, մասնավորապես, ի դեմս սիրիահայերի:  Սակայն, ինչպես պարզ դարձավ  մայրաքաղաքի անշարժ գույքի գրասենյակների ղեկավարների հետ զրույցներից, այդ հույսերը չարդարացան:

Անշարժ գույքի մեր շուկայում մշտապես առաջարկը գերազանցել է պահանջարկը: Վերջին տարիներին, ըստ ռիելթորների,  այդ տարբերությունը նկատելիորեն աճել է` գնողունակ պահանջարկի լճացման համապատկերում: 2007-2012թթ. Երեւանում առքուվաճառքի գործարքների թիվը նվազել է  2 հազարով կամ 20%-ով:

Միաժամանակ, ինչպես եւ ակնկալվում է, նվազել են բնակարանի գները: Նկատենք, որ ամենաբարձր գներն արձանագրվել էին 2008 թ-ին: Այսպես, վերջին չորս տարվա ընթացքում մայրաքաղաքում մեկ քմ միջին շուկայական գինը նվազել է 39 հազ. դրամով կամ 13,2%-ով:

Եթե հաշվի առնենք, որ շատ գործարքներ կատարվում են դոլարով,  ապա կստացվի, որ Երեւանում մեկ քմ միջին շուկայական գինը նվազել է  328 դոլարով կամ 34%-ով:  Այսինքն, ընդամենը չորս տարվա ընթացքում բնակարանների գները նվազել են մեկ երրորդով: Ընդ որում` ամենամեծ անկումն արձանագրվել է «ամենաթանկարժեք» Կենտրոն վարչական շրջանում:

Չնայած դրան` այստեղ գները շարունակում են ամենաբարձրը մնալ. օրինակ, անշարժ գույքի առքուվաճառի հայտարարություններ հրապարկող կայքերից մեկում այստեղ առանձնատներից մեկի գինը հասել է 1,4 մլն դոլարի, իսկ բնակարաններից մեկինը` 0,38 մլն դոլարի:

Ուշագրավ է, որ այստեղ թե առանձնատան, թե բնակարանի  1 քմ-ի գինը նույնն է`2 հազ. դոլար: Սակայն այդ գները պետք չէ ընդունել որպես վերջնական:

Միաժամանակ, ըստ պաշտոնական տվյալների,  անշարժ գույքի միջին գինը ընթացիկ տարվա ապրիլին կազմել է 573 դոլար` մեկ քմ-ի համար:

Հաշվի առնելով փաստերը` մայրաքաղաքի ռիելթորական գրասենյակների ներկայացուցիչները անշարժ գույքի շուկայում հետագա «զարգացում» են կանխատեսում: Նրանց կարծիքով, այդ ոլորտում հաջող բիզնեսի համար կարեւոր են ոչ այնքան գները, որքան գործարքների քանակը: Իսկ վերջին ուղղությամբ առանձնապես առաջընթաց չի նկատվում եւ մոտ ապագայում չի կանխատեսվում...

Ալբերտ Խաչատրյան

Լուրեր Հայաստանից - NEWS.am

Առցանց վճարում

WIDE RANGE OF PAYMENT METHODS

Օգնությու՞ն է պետք Հարցրու մեզ

DO NOT HESITATE TO CONTACT US